ഭൂവനേശ്വര്‍: ഇന്ത്യന്‍ വനിതാ ലീഗില്‍ ഗോകുലം കേരളയുടെ പെണ്‍പട നാളെ ഇറങ്ങുന്നു. ലീഗിലെ ഏഴ് മത്സരത്തില്‍ ഏഴിലും ജയിച്ചു നില്‍ക്കുന്ന ഗോകുലം നാളെ കിക്ക്‌സ്റ്റാര്‍ട്ട് എഫ്.സിയെയണ് നേരിടുന്നത്. വൈകിട്ട് 3.30ന് കാപിറ്റല്‍ ഗ്രൗണ്ടിലാണ് ഗോകുലത്തിന്റെ മത്സരം.
പോയിന്റ് പട്ടികയില്‍ ഗോകുലം കേരളക്ക്് തൊട്ടുതാഴെയായി മൂന്നാം സ്ഥാനത്ത് നില്‍ക്കുന്ന ടീമാണ് കര്‍ണാടകയില്‍ നിന്നുള്ള കിക്ക്‌സ്റ്റാര്‍ട്ട് എഫ്.സി. തുല്യ ശക്തികള്‍ തമ്മിലുള്ള മത്സരമായതിനാല്‍ ഇന്ന് മികച്ചൊരു പോരാട്ടം കാപിറ്റല്‍ ഗ്രൗണ്ടില്‍ പ്രതീക്ഷിക്കാം.
ലീഗിലെ ഏഴു മത്സരത്തില്‍ രണ്ട് ഗോള്‍ മാത്രമേ ഇതുവരെ ഗോകുലം വഴങ്ങിയിട്ടുള്ളു. മുന്നേറ്റത്തില്‍ ഘാന താരം എല്‍ഷദായ് അചെങ്‌പോങ്, മനീഷ് കല്യാണ്‍, ഡാങ്മായി ഗ്രേസ് എന്നിവരിലാണ് ഗോകുലത്തിന്റെ പ്രതീക്ഷ. വിങ്ങിലെ പ്രതിരോധത്തിനൊപ്പം ഓവര്‍ലാപ് ചെയ്ത് അറ്റാക്ക് ചെയ്യാന്‍ കരുത്തുള്ള ഡാലിമ ചിബ്ബറും ഗോള്‍ വലക്ക് കീഴില്‍ ഇന്ത്യന്‍ ഗോള്‍കീപ്പര്‍ അതിഥി ചൗഹാനും പ്രതിരോധത്തിൽ ഇന്ത്യൻ ക്യാപ്റ്റൻ അശാലതാ ദേവിയും അണിനിരക്കുന്നതോടെ എട്ടാം മത്സരത്തിലും ജയവുമായി മൈതാനം വിടാനാകുമെന്ന പ്രതീക്ഷയിലാണ് പരിശീലകന്‍ ആന്റണി ആന്‍ഡ്രൂസും സംഘവും.
Comments are closed.