മലയാള ടെലിവിഷൻ മാദ്ധ്യമ പ്രവർത്തനം ഇത്രയും അധ:പതിച്ച ഒരു കാലമുണ്ടായിട്ടില്ല.
ഇന്ന് ,സ്വപ്ന സുരേഷിന്റെ ഓഫീസിനു മുന്നിൽ ക്യാമറയുമായി , ഉച്ച മുതൽ തൽസമയ പ്രക്ഷേപണത്തിനെത്തിയ റിപ്പോർട്ടർമാരേയും അതിന് അയച്ചവരേയും ഓർത്ത് സഹതപിക്കുന്നു.
– യുദ്ധം,ദുരന്തം, മന്ത്രിസഭാ രൂപീകരണം / രാജി തുടങ്ങിയവ റിപ്പോർട്ടു ചെയ്യുന്നതിനെക്കാൾ ഉദ്വേഗഭരിതമാണ് അവർ സൃഷ്ടിച്ച അന്തരീക്ഷം.
വാർത്തയിലല്ല, കുറ്റാന്വേഷണ, മസാലക്കഥകളെപ്പോലെ ജിജ്ഞാസ ഉണ്ടാക്കി, പ്രേക്ഷകരെ പിടിച്ചിരുത്തുന്നതിൽ മാത്രമാണ് അവർക്ക് താല്പര്യം.
– എന്താണ് വാർത്ത ?
എന്തല്ല, വാർത്ത ?
എത്ര പ്രധാനപ്പെട്ടതാണങ്കിലും ഒരു developing storyയിൽ, അതിലുൾപ്പെട്ടവർ മുടി ചീകുന്നതു മുതൽ തന്നെ ലൈവ് കൊടുക്കുന്നതിലാണ് ചാനലുകൾ തമ്മിൽ മത്സരിക്കുന്നത്. മൂന്ന് മണിക്കൂർ ലൈവിൽ പരമാവധി വാർത്തയായുണ്ടാകുക മുന്നോ നാലോ വാക്യങ്ങളോ ഒന്നോ രണ്ടോ മിനിറ്റ് ദൃശ്യങ്ങളോ ആയിരിക്കും. ബാക്കിയെല്ലാം , പുക ; കട്ടപ്പുക!
ഒട്ടും വിശ്വാസ്യതയില്ലാത്ത ഒരാൾ മുഖ്യമന്ത്രി, സി.പി.എം. സംസ്ഥാന സെക്രട്ടറി എന്നിവർക്കും, ബിലീവേഴ്സ് ചർച്ചിനുമെതിരെ ഗുരുതരമായ വ്യക്തിഹത്യ നടത്തുന്നു; ആരോപണങ്ങൾ ഉന്നയിക്കുന്നു. അതും , വളരെ കാഷ്വലായി. ഇവർ ഈ ചാനലുകൾക്കെതിരെ , മാനനഷ്ടത്തിന് ക്രിമിനൽ കേസ് നൽകട്ടെ. വളരെ അപകടകരമായ പ്രവണതയാണിത്.
ഉള്ളടക്കം എന്താണന്നറിയാത്ത ഒരു ലൈവിൽ, ഇങ്ങനെ ആർക്കും എന്തും വിളിച്ചു പറയാമെങ്കിൽ, ചാനലുകൾ
അത് ആവർത്തിച്ച് പ്രക്ഷേപണം ചെയ്യുമെങ്കിൽ,എത്രമാത്രം ഭീകരമാണ് അവസ്ഥ !
നിരവധി കേസുകളിൽ കുറ്റാരോപിതയായ ഒരാളാണ് സ്വപ്ന. ആരോപണമുന്നയിക്കുന്നയാൾ മാദ്ധ്യമ പ്രവർത്തകനായിരുന്ന ഒരു അധികാര ദല്ലാളും .
ഇവർക്കൊക്കെ വായിൽ തോന്നുന്നതത്രയും വിളിച്ചു പറയാൻ ചാനലുകൾ തുറന്നു വയ്ക്കുന്നത് ക്രിമിനൽ കുറ്റമാണ്. ഇത് മാധ്യമ പ്രവർത്തനമല്ല.
– പക്ഷേ,അവയെല്ലാം മലയാളിക്ക് വലിയ entertainment ആകുമെന്നതാണ് ചാനലുകൾ മാധ്യമ ധർമ്മവും എത്തിക്സുമൊക്കെ വഴിയിലുപേക്ഷിക്കുന്നതിന്റെ ട്രേഡ് സീക്രട്ട്. വാർത്തകൾ അറിയിക്കുന്നതിലല്ല, അനുബന്ധ കഥകളാലും ദൃശ്യങ്ങളാലും രസിപ്പിക്കുന്നതിലാണ് കാര്യം. വേലയും കൂലിയുമില്ലാത്തതിനാൽ മിച്ച സമയം ധാരാളമുള്ള ഒരു സമൂഹത്തിന് ഇത് വലിയ ഹരമാകുന്നതിൽ അത്ഭുതപ്പെടാനില്ല.
വേലയും കൂലിയുമില്ലാത്ത സമൂഹത്തിന് ഇത് വലിയ ഹരമാകുന്നതിൽ അത്ഭുതമില്ല
